من كام يوم ويوم 23 ديسمبر تحديدا لاقيت صديكي شاب فقري بيقولي عايز رايك في البوست اللي انا كتبته وضروري تقراه ... دخلت اقرى البوست اللي هو بأسم إلى كل مدوني الأرض ولاقيت البوست بيتكلم عن واحد خدع واحده ( الامر عادي جدا رجالة كتير بيخدعوا واحايد باحتراف وفي بنات متمرسة في موضوع الخداع دا )
بس اللى مأثر في نفسية شاب فقري ان اللي عمل كده مدون وانه بيتعامل بأكتر من مدونة وبكذا شخصية مختلفة وبكل مدونة بيخدع واحده مدونة بردو
حبيت اقول لصديقي شاب فقري ان عالم التدوين مش عالم مثالي ولا المدونين دول انبيا منزلين دول بشر وعاديين جدا بس متميزين في انهم بيعرفوا يكتبوا ويعبروا عن ما يجول بعقلهم وصدرهم
في منهم المحترم اللي بيراعي ربنا وفي اللي مبيراعيش .. وفي اللي بيعتبر العالم الافتراضي دا عالم يهرب بيه من عالمه الحقيقي... وفي ناس زي ما هي عالنت زي ما هي في الحقيقة متفرقش اطلاقا
هتلاقي كتير ... وهتلاقي عالم الانترنت مليان مش المدينة الفاضلة اكيد
طيب ما انا اهو ماظهرتش اسمي الحقيقي لحد النهاردة وقليلين جدا جدا جدا اللي يعرفوا انا مين بالظبط 4 افراد انت واحد منهم وانت عرفت بس من يومين
وانا نويت اقول انا مين لان المدونة فقدت السبب اللي انشأتها بسببه اصلا وفي ناس كتير قالتلي متكتبش البوست دا ....انا مدون قديم مش اول مرة ادخل عالم التدوين ولا حاجه ليا مدونة تانيه بس كنت كل ما اكتب موضوع فيها وابحبح واخد راحتي الاقي الناس تزعل اوي وتقول دا مش اسلوبك اللي متعودين عليه
قلت يا واد انت اعمل مدونة تانيه واتكلم فيها براحتك قول كل اللي نفسك فيه باي لسان ويبقى الناس من اول يوم عارفه ان المدونة دي الكلام فيها بيكون فرش ملايه فاللي عايز يقرا فرش الملاية يشرف وينور واللي مش عايز فانا احترم وجهة نظره
ولأني قريت رد عندك للاستاذه ستيته وهي بتقول قولنا مين افضل من ان الشك يخلينا نتهم ناس ملهاش ذنب وخصوصا ان في فرد من ال 4 اللي اعرفهم دماغه بتحب تسرح وتتخيل حاجات غير حقيقية فانا فضلت اقول انا مين مع اعتبار ان شاب مفقوع دا كان الوجه الاخر ليا اللي عايز يعترض براحته وهو فارش الملايه
ويشهد الله اني مكلمتش مخلوق باسم شاب مفقوع دا اكتر من مجرد رد في مدونة واللي شايف غير كده يقول
وصدقني يا كريم في ناس والله العظيم ليها مدونة و2 و3 وكل مدونة باسم كتير مش الشخص اللي اتكلمت عليه بس ومتمرسة في الخداع بنات ورجاله مش رجاله بس ولا بنات بس
لا الرجاله ملايكه ولا البنات ملايكه
في ناس ممكن تكدب الكدبه وتحلف لك بايمانات المسلمين كلها وانت تصدق وتقتنع لدرجة انك تشك في نفسك وتحس ان انت اللي ظالم وجبار وفي الاخر تكتشف انهم بشر (وهم ... مرض) موجودين بألف وش
إذا كان اللي اتكلمت عنه خدع اكتر من بنت فانا اعرف بنات بتخدع اكتر من راجل في نفس الوقت
فمتزعلش نفسك على حد ..... كل نفس بما كسبت رهينه ...... وما ربك بظلام للعبيد
تحياتي ليكم ....... دلوقتي الكل عارف انا مين بس بردو هاكتب هنا براحتي
